Vun Grillen un Kannibaliseren

23-93666752

von
07. Juni 2018, 10:27 Uhr

Wat för en Freid! Grilltiet! Vun överall her, ut Hüüs un ut Goorns, höör ik't larmen, juchen, stiggt mi de Ruuch vun Wust un Koteletts un Steaks in mien Nees. Düütschland is in't Grillfever. Dor warrt allens, wat na Fleesch utsüht, op den Grillrost smeten. Binoh ok uns Kanzlersch Angela Merkel. Mann in de Tünn, wat hett de för'n Glück hatt, dat se in ehr „Plauderstunn“ in'n Bunnesdag nich vun de hungrige Oppositschoon grillt worrn is, so is dat vundag in uns Blatt to lesen. Kriegt de dor nich noog vört't Mess?

Vör so'n Aart Hunger hett Sozialminister Heiner Garg böös Manschetten, wenn he seggt, de Kliniken in uns Land schullen sik bi dat Afwarven vun dat Pleegpersonal in Olenheime nich gegensiedig kannibaliseren. Ik mutt reinut seggen, mi schuddert bi dit Bild. Heff malins in de School lehrnt, Kannibalen, dat weern Minschenfreters.
Mi dücht, de dagdägliche Hitten is dor schüllig an, dat wi uns disse verdwarsten Spraakbiller gefallen laten mööt. Dat is eerst'n poor Daag oolt, dor weer to lesen, dat soziale Klima in uns Sellschop weer koolt bi över en Milljonen „Kids“, de ünnerhalf vun'e Armootsgrenz leven müssen. Mutt'n dit Klima nu noch dörch Grillen un Kannibaliseren tosätzlich anböten?








zur Startseite

Diskutieren Sie mit.

Leserkommentare anzeigen