zur Navigation springen
Eckernförder Zeitung

17. Oktober 2017 | 04:49 Uhr

To Hölp, to Hölp

vom
Aus der Redaktion der Eckernförder Zeitung

von
erstellt am 17.Feb.2016 | 12:50 Uhr

Bi dat Lesen vun den Artikel „Die Leidensfähigkeit ist erschöpft“ heff ik en poor Mol deep Luft holen musst. Dorna stunnen mi de Hoor to Barg. De Herren Behrens, Grote un Krohn, groot in’t Bild, maakt uns Börgers gehörig Angst. Se höört to de Chef-Etaasch vun Green-Screen un stöhnt un jankt, dat ik meistto Hartklabastern krieg. En Kino mutt her, en Saal mit tominst 200 Plätze mutt al dorbi ween, anners … En Wink mit den Tuunpahl. Anners müss en över en annern Standoort … nä, nä, Eckernföör schull, schall, müss blieven, wenn … Kiek mol, heet dat an en Steed, wi vun Green-Screen sünd doch eens mit Eckernföör un wüllt dissen Naam in de grote wiede, internatschonale Naturfilmwelt drägen. Mit de „unterirdische“ Tonqualität bitherto würr dat aver nich gahn.

Kann ik verstahn, leve Lüüd. Jüm duert mi. Kriegt man blots Johr för Johr 50  000 Euro vun de Stadt un opto, nadem jüm de Kulturministersch annert Johr binoh ut den Saal jaagt hebbt, mit unanstänni Wöör, nu ok noch vun de Regeren bavenop en grote Batzen, de se jichenswo in en Eck vun den Lanneshuusholt funnen hett. Wat schüllt de Theoter- un Musikfrünnen, de Plattdüütschen, de „Lehmänner“ un all de annern Verene un Verbännen in uns schöne Stadt dorto seggen? Se harrn ok geern en Stück vun dissen Koken af hatt. Denkt ok mol an de. Geiht dat, leve Grotes un Co., nich en lüerlütt beten torüchhollernscher? In mien Ohrn hört sik de Spruch, dat „Green-Screen un Eckernföör eens sünd“, recht wat hoognesig un dickdoonsch an. Un liekers tell ik mi to jüm Frünnen. Hölpt mit, dat dat so blifft.


zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen