Inkoopsbummel

23-93666752

shz.de von
22. November 2018, 15:14 Uhr

„Korl“, sä mien Fru annerletzt bi’t Fröhstück, „hest nich Lust...?“ „Du meenst ...?“ „Bi Schmidt in Husum sünd wi al lang nich mehr ween. Keen Bang, kopen will ik nix, man blots en beten kieken un so.“

Beten kieken un so. Ünner dree Stunnen würr ik dor nich vun afkamen. Aver manto! Mi düch, dat Koophuus harr al op uns luert, överall güngen de Dören vun alleen op. „In de Damenafdelen, Korl, kannst op mi töven, duert ok nich lang.“ Un weg weer mien bestet Stück.

Minuten later keem en öllerhafti Matron mit ehren stackeligen Mann anschuven. „Kiek, Jochen, dor sitt al en, nu büst nich alleen“, reep se un damp af. Un so güng dat in’n Minutentakt wieder. Op’t letzt säten dor söss truri Hahns as op en Höhnerledder, blots kakeln däen se nich, harrn dor woll ok keen Kraft mehr to. As dat op Meddag togüng, weern all bi to slapen.

„Na, Korl, weer woll nix mit Fruuns bekieken?“, reet mien Fru mi ut deepste Drööm herut, „heff leidergotts nix Örnliches funnen, schull dat viilicht mol bi Mohr in Eckernföör versöken.“

Mann in de Tünn, wat hett disse Fru för en Gedüer, wenn’t um’t Inkopen geiht.





zur Startseite

Diskutieren Sie mit.

Leserkommentare anzeigen