De Jung mutt an de frische Luft

23-93666752

DSC_1119.JPG von
06. März 2019, 17:05 Uhr

Mann in de Tünn, ik heff lang nich mehr so vun Harten lacht, gliektiedig avers ok dicke Tranen vergaten as bi den Film över den jungen Hape Kerkeling. Ik bün nich blots Tokieker, nä ik bün Deel vun en Grootfamilje mit Mama, Papa, Unkels, Tanten, Omas un Opas un Navers, wo jedereen för den annern dor is, wenn Holland in Noot is. Un för den lütten Hans-Peter is Holland in Noot na den Dood vun sien Oma un korte Tiet later vun sien Mudder. En Oma un twee Opas hebbt em in jemehr Arms slaten, ünner de Beetdeek krupen laten un em toswietert: „Du büst nich alleen, Hans-Peter!“ En Bild ut den Ruhrpott Anfang vun de söventiger Johren: Leven un Dood, truern un fiern un malochen un tosamenholen un merrn mang en Jung, de dörch sien komödiantischen Talente begeistert.

Bi’t Rutgahn is mi kloor worrn, dat mi disse Film, wenn ok man blots för’n korten Momang, in mien „Jungsparadies“ torüch föhrt hett. De lütt Hans-Peter, de weer ik, de Omas un Opas un Unkels un Tanten weern Opa Hans un Oma Frieda un Tante Anna un Unkel Fritz un ...

Vörbi. En Barg Hans-Peters un Elses sitt in disse Dagen vör de Mattschieven oder sünd mit jemehr Handys togang oder ... un weern froh, wenn dor ener se eenfach mol an de Bost drücken würr. So as Opa Willi in den Film.




zur Startseite

Diskutieren Sie mit.

Leserkommentare anzeigen