100 Sekunden Platt Vör hunnert Johr

Von Marianne Ehlers | 08.03.2014, 06:30 Uhr

Wie war das damals, im Jahre 1914? Marianne Ehlers erzählt anhand eines alten Fotos.

In düt Johr höört un leest wi veel vun dat, wat vör hunnert Johr in uns Land los weer. Un jedereen hett Geschichten ut de egen Familie, een bruukt blots mal de Zigarrenkist mit de olen Swart-Witt-Biller ruthalen. Kiekt wi doch mal tosamen op een so 'n Foto ut dat Johr 1914:

Ach, wo vergnöögt se doch sünd! „Die lustige Runde“ hett een vun de Kameraden op en Pappschild schreven, extra för den Fotografen. All hebbt sik fein opbuut, ehr dat se aflicht worrn sünd – twee vun de Mannslüüd liggt ganz vörn an op 'n Footbodden, welk sitt op 'n Stohl un de Rest steiht achtern in de letzte Reeg.

17 Mann hooch, un twee sorgt woll för de Musik. Se hebbt jeder en Quetschkommod vör sik op 'n Schoot. Villich hett de Fotograf seggt: „Speel man ruhig en beten, wenn ik jüm aflichten do, denn freut se sik tohuus, wo vergnöögt jem sünd!“

Grootvadder sien Kompanie... Se liggt bi Verdun, un keeneen weet, wann dat torüchgeiht na Huus – un of se torüchkaamt. Dat schient, as wenn se all nich doröver nadenkt, as of se versöökt, dat Best ut de Situation to maken. „Die lustige Runde“...

3289682188001

Dat Bild is en Postkort, de Grootvadder an sien Swester schickt hett – de Kort is in Frankriek afstempelt. Un Grootvadder schrifft, dat em dat goot geiht, dat he nich hungern mutt un dat he un sien Kameraden veel an to Huus denkt. He schrifft nich, wo oft he scheten un wo lang he in'n Graven liggen mutt. He fraagt na düt un dat, na de Familie, ob de Deerten gesund sünd un of dat Heu dröög rinkamen is.

Blots en Bild? Veel mehr, en ganze Tiet, en düster Tiet, liekers op en Pappschild „Die lustige Runde“ steiht.

Grootvadder is torüch kamen, torüch na Huus. Verdun hett he nienich vergeten in sien Leven.

Nadenkern Gröten vun Marianne Ehlers vun den Sleswig-Holsteenschen Heimatbund.