100 Sekunden Platt Drink di een – oder lever twee?!

15.03.2014, 06:30 Uhr

Früher oder heute – es gibt so Zeremonien rundum Kööm und Bier, so berichtet Marianne Ehlers.

„Weg mit em!“ –
„Neih em dal!“
„Nich lang snacken...“
„Op een Been kann ik nich stahn!“
„Een – twee – dree – weg!“

Na, wat sünd denn dat för dösige Snacks! Ach so, wi sünd bi uns Kneipe üm de Eck – un de Jungs hebbt Fieravend un meent nu, dat geiht nich ahn Beer un Kööm. Denn man to, man nich so dull, leve Lüüd!

Fröher, ja ganz fröher güng dat männichmal dull to – so as in de  grote Tiet vun de Gillen. De Gillbröder – Gillsüstern geev dat do noch nich – hebbt sik toproost ahn Enn, mit Musik dorbi.

„De Gesundheiten sünd mit Pauken un Trumpeten op dat Allerbeste drunken!“

3289740352001

De niege König müss twölf Bowlen Punsch spenderen – un denn güng dat mit Musik un in’n Schien vun Fackeln üm Middernacht na Huus. Oha, wat weer dat för en Tiet!

Un so nevenbi vertellt: de ole Bismarck hett geern glieks na ’t Fröhstück en Kööm to sik nahmen.

En anner Snack twüschen twee Mannslüüd geiht so:

„Ik seh di!“
„Dat freut mi!“
„Ik drink di to!“
„Dat do!“
Kort un knapp – man allens is seggt.

Un de Volksmund hett ok feine Snacks op't Lager. So as:

„Is dat Beer in den Mann, is de Verstand in de Kann.“
„In'n Kööm versuupt mehr Minschen as in't Water.“

Man dat wöllt wi ja ok nich – dat mit dat Versupen, meen ik.  Uns schall dat ja gootgahn, vundaag un ok denn, wenn wi oolt sünd – man dat is en anner Geschicht, de nächst Geschicht!

Gröten mit en „Proost“ dorbi vun Marianne Ehlers vun den Sleswig-Holsteenschen Heimatbund.