Platt singen

Annerletzt full mi en lütt blaue Book in de Hand: "Uns plattdüütsch Singbook för plattdüütsch Land un Waterkant", rutgeven vun Fritz Jöde in den olen Fehrs-Gillen-Verlag. O man, heff ik dacht, seker all so'n swögigen Kraam. Man lang nich! Ik heff Leder na Texten vun Klaus Groth un Johann Hinrich Fehrs funnen - un dat ole Leed "Ännchen von Tharau" op Platt mit en Text vun Gorch Fock: "Meisje van Flandern, du bleuhst as en Roos! Kickst du na See hen un söchst en Matroos? Söchst en Mariner? O Deern, kiek mi an: Hier is dien Brögam un hier is dien Mann!" Un so geiht dat wieder - so en feine Leevsleed! Nich fehlen dörv de "Lütte Buerdeern", de twee Jungs so leev harr - dat schall dat geven, fröher un ok vundaag.

Rutfunnen heff ik ok, wat dat mit den suern Buern op sik hett, opschreven un vertont vun Fritz Jöde: "Worüm süht he so suer ut? So süht he vun Natur ut, uns Buer. De ganze Week Kantüffelsupp un sünndags is se noch nich up, droüm süht he so suer ut, so suer ut, uns Buer." Denn löppt mi Jan Hinnerk ut de Lammerstraat över den Weg, dat dor lange Leed mit de velen Wedderhalens, hebbt wi fröher in de School sungen.

Un ok noch Buurlala, dor fallt mi glieks mien Grootvadder in, de mi jüst düt Stück ümmer wedder vörsungen hett. Wat för en gruligen Text, heff ik as Kind gornich markt! Vun Dootscheten un Starven, oha! Un de letzte Stroph, de hett dat in sik: "As Buurlala in'n Heven weer, uns Herrgott spröök to em: Na Buurlala, wo gefallt dat di hier baven in den Heven bi mi? Na, dat geiht, seggt he, na, dat geiht, seggt he - na, dat geiht, seggt Buurlala."

Sing mal en beten mit Marianne Ehlers vun den Sleswig-Holsteenschen Heimatbund

In Verbindung stehende Artikel:

Dat sünd de Olchis

Seniorenkaffee

Föhlen in't Fröhjohr

Wat de Lüüd so seggt

Schimpen op Platt

Koolt in de Bood