Biiki 2013

Nü wiar dit al weder en Jaar sent, dat ik bi di Biiki ön Kairem stön en mi früget, dat dit rocht sa fain oflöp. Diarom her ik mi fuarnomen, uk jaarlung weder ön Kairem tö Biiki tö gungen. Hat jit jest, di Lir skul jam om Kwart fuar soks bi di Füürwiar sammli en Kwart aur soks skul dit da tö di Biikiplaats bi Tipgenhoog gung. Man aur wü nü al sa lung di Winj fan Uasten her, waar di Stak jit waker üp en üder Feen ompaket. Didiarem Feen liar büten fuar dit Térp nai bi di Aurgang fan di Baan, hur jer di Stich tö Árichsem föört. Dit wiar en gansi Wai diarüt. Man dit es sa, wan em dit Lön sa techt bibech let. Da mut di Kultur wik. Man dit ken noch ek wiis. Biikibrenen mut ek ütfaal!

Ik ging nü al jens fuar di Fakeltoch üt tö didiarem nii Plaats en luket di Lir öntöögen üs ja, Ual en Jung diar me jaar öntjent Fakel önkám. Wat haa ik mi früget, üs ik didiarem lüng, lüng Toch diar önkumen saag. Di noom gaarniin Jen. Dit wiar nü ek bluat Sölring. Naan diar wiar uk en gurt Diil Freemern diarbi, wat nü jit jens tö Forhaaling üp Söl sen. Uk me litj Jungen, wat jit ek tö Skuul sen. En wat wiar ja altermaal ápreeget. Fan di Jungen jert ik bluat langsen: "Hur es da nü di Biiki?" Tja, di uur jaa eegenlich jest öntjent, wan di Önspraaken hölen sen en dit jit: "Biiki, flami áp." Deling uur di al öntjent, wan di Lir önlaapen kum. Man uk gur, hat anert höm langsen wat.

Ön di Önspraaken waar weder üp di Uuningsnuar fuar di jung Sölring henweeget, wat tö Fastlön tii, om en Uuning tö haaen, wat uk tö bitaalin es. En dáanen, wat jir aarberi ken jaa uk ek önerkum. Dit skul em uk üp di Reeg fo. Aliksa üs üüs Friisensaal, wat nü weder üs Saal brükt uur. Naja, di Skanplak "Therme" staant diar nü jit, man mesken heer jaa jens hoken en Idee en fo di wech. Hat wiar en faini Biiki, jit beeter üs forleeren Jaar.