In dat Dörp, wo ik opwussen bin, geev dat dree Buern mit de Naam Thomas Thomsen. De harrn jeder twee Binaams. Een weer för dat Amtliche un för de Post: Thomas Thomsen "Ost", "West" un "Süd". De anner Binaams harrn sik wohl ut de Familiengeschicht ergeven: Petschers, Peers un Markusses Thomas. Siss "echte" Stammnaam wurr vun de Hiesigen in’t Dörp nich nöömt. Mit de Binaam weer kloor, wo grade vun snackt wurr.

Noch duller mutt dat ween sien in en Dörp in’e Westen. En Leser vun dor hett mi vertellt, in dat Dörp hett dat sogor söven Christian Christiansens op mal geven. In de Fall hulpen natürlich uk blots Binaams oder Ökelnaams (Spitznaams), dat een de Familien all utenanner holen kunn.

To en Ökelnaam kaam Lüüd dörch en besünnere Egenoort in’e Körperbu oder in’t Benehmen. Wodennig de lange Hans oder de dicke Klaus utsehen hebben, kann een sik denken. Tine Kniep weer kniepig (giezig). De "Afkaat" wusste över allens ganz genau Bescheed un harr immer Recht. "Tante Torrad", de Hebamm, keem, wenn’t sowiet weer, mit Motorrad ansuust.

Wenn Lüüd frisch totrucken weern, harrn se dat mit all de Bi- oder Ökelnaams in en Dörp böös suer. Se kemen dorbi licht mal dösig afsteed, un för de annern geev dat denn wat to lachen. Sodennig ging dat de junge Schoolmeister in Bordelum mit de Smitt Reinhold Petersen. De Smitt weer uk keen "echte" Bordelumer. He weer in Lüngerau opwussen. In Bordelum weer he glieks opfullen dormit, dat he immer "I" sä (hoochdüütsch "Ihr") un nich "Jem". Foorts weer de Smitt för dat ganze Dörp "Reinhold I". As de niee Schoolmeister de Hülp vun en Smitt bruke, wurr he vun en Nachbor na "Reinhold I" schickt. He begröte de Smitt mit: "Guten Tag, Herr I". Dor hebben sik de Lüüd al vör gut föfftig Johr över amüseert. Aver uk hüüttodaags warrt de Geschicht immer noch mal wedder vertellt.

Binaams röhren öft vun de Beruf her. Wat Macke Buer, Martin Smitt, Bernhard Muermann, Karl Timmermann, Emil Schoster un Grete Neihdeern vun Beruf weern, kann een sik denken. Bi Peter Kuhle mutt man al en beten mehr spekuleren. He weer Kirchendener un musste de "Kuhlen" utgraven, wenn dor een beerdigt warrn sull. Hein Oog is Ogendokter ween. An disse Steed grööt ik Peter Unimog. He hett vele Johrteihnten op dat Fohrtüüg bi de "Kass" arbeitet.

All disse Lüüd weren wiet un siet bekannt ünner siss Binaam. Aver, wat heten se op’t Papier? De Fraag hett nie en grote Rull speelt.

Kontakt: Tel.: 0461 3184707 E-Mail: a.jensen@stage-combat.de