Bild 1 von 2

Nuurdfresklun. En arewdial brangt hoodwark! Wi san nü "Weltnaturerbe"! Sant aanj jüünemuun as at fresk waas faan a Unesco ütjtiaknet wurden. De grünj, wat dials drügleit, wan a ääb iinsaat hää, as wäärdag, auer hi fol faan laben getiir an siaplaanten as.

Jo sköölen faan lidj wat arke somer faan Feer auer tu Oomram auer’t waas wanre, fu man en letj dial diarfaan tu sen, oober jo feel det grat rikdum faan a na tüür. An jo fu det bedüüdang faan a waasluuper fer klaaret. At waas as an biotop, huar tjiindüüsen tiar- an plaantenslacher lewe. Nü wel üüs tourismushalper, wat al loong al üüb det ütj tiaknang luuret haa, diarmä muar baaselidj looke.

Fööraal minsken ütj Öösterrik an a Schweiz skel troch detdiar Unesco-beluanang neiskirag maaget wurd. Man hü koon üüs waas so bekäänd wurd üüs a Grand Canyon of a Serengeti? Kluuk lidj san diarüüb kimen faan Afrikoo tu liaren. Arken käänd de slogan: "Big Five", an arken, wat en afrikoonsen natsjonool-park besjükt, fraaget an luket diarefter: elefant, büfel, nööshurn, leopard an lööw

Nü wel lidj ütj a tourismusbranche baaselidj mä de slogan: "Small Five" looke. Diartu tääl jo a soongreewlang, kaamk, kraab, por an waassnek. Diiwel uk, diar skal ’am ham iarst ans tu wene! At jaft ferlicht uk beeder tjüchlang, wat ham üüs "Small Five" för a apartag waasnatüür ütjtiakne koon: Fiiwfut of hees, selag, hurnfask, liiw, eidergus of kub! Uun sakelaad an marsipoon jaft det sowat al loong al.

Oober wat skal det bring, wan ’am an waaswirem üüb’t baadtjüch, üüb’t hoonduk, sjürt of skriiw papiir ferkuupe wal? Ferlicht skul ’am diar dach noch en betj muar auer efterseenk, an hoker leept at al kuul a rag deel, wan’r lik auerföör en soongreewlang stäänt?