Bild 1 von 2

Oomram. At woort baut üüb’t lun, wat man gongt. Arken dai kem diar grat lastwaanjer mä baumateriool mä’t skap. Uk am söninjem keer en buul hoonwerkers mä amern an werktjüch mä a iarst damper auer an bring tu aanj, wat jo uun a ferleeden weg ei skaafet haa!

Uk üüb Oomram bi strun woort baud. Jo wontersturmer wiar mil an jo bekäänd apsaat borager bi Kniip haa’t huuuchweeder an a hard winjer hial auerstenen. Sant ferleeden juar stäänt nü uk en holtskül föör’t düner kaant tesk Neebel an Noorsaarep, wat ei jüst uun senelk as an auer wos as ’ar en huugen türn bibaut wurden. Ham seenkt, diar as en natüürfrinj, wat di grat rikdum uun’t uug hual wal, wat a fögelwelt bi Kniip bad. Üs wat at ütjsjocht, mei didiar natüürfrinj ei hal sastag wees, diar lei nemelk alerlei leesag butler ambi an wan ham naier komt, sjocht ’am det skilt: Bar. Man jüst so üs uun a saarpen, jaft at uk bi Kniip ei bluat "Bausünden".

Nai bi’t weeder stun rocht smok, nögen an fööraal apredet strun-buuden. Strunluuper haa flitjag strunholt an ööder strungud tuup saameld. Mä bruket need, fasker-kasjin, toogen, priken, pualer an wat a sia ales so uundraft, san a buuden ütj stafiaret. Uffaal an grant jaft at nooch bi strun. Fööraal jo ruad hoonkluaser faan a fasker wurd hal üs dekoratsjuun brükt.

Hög buuden san uk uunmoolet an uu so apredet. Ham markt, dat a strunluuper jo hir welfeel.Wilems sjocht ’am uk bluas pualer mä strungud. Jo san turochtmaaget, üs wan diar en denkmool of en indiooner-tootempual stäänt. Huaram uk ei, det paaset was uun a eilun-natüür üs "instala tsjuun", üs ’am sait. A baaselidj haa föl tu knipsin!