Kennst du dat Land, wo de Zitronen blöht? heet dat in Goethes "Mignon". Nä, dat kenn ik nich, aver dat Land, wo de Bananen waßt. Vundag, Maandag den 30. August, heff ik’t to weten kregen, klock fief na twölf in’t drüdde Programm. Fernsehen bildt, all wat recht is. Se waßt vör uns Huusdöör, de Bananen, hier in Sleswig-Holsteen. De Politologe Professer Krause vun de Uni Kiel hett dat seggt, as he na dat Sleswiger Urdeel to dat Landeswohlgesetz befragt würr. Wi weern man nu na dit Urdeel vun de söben Richters en Bananenrepublik. De hebbt neemli beslaten, dat dat Gesetz, dat bitherto golln hett, gegen Recht un Gesetz verstöten würr un en niet Gesetz her müß un dat de Landdag bit latestens September 2012 oplöst warrn mutt. Ik kaam mi tatsächli as en Aap in den Bananenwald vör. Woans kann dat angahn, fraag ik mi un jöök mi stüttig den Kopp, dat dor Fruuns- un Mannslüüd in’n Landdag sitten oder slapen dörft, de dor egens na dit Urdeel nich henhört? Wat is mit disse söben Richters, de jo op’t letzt vun en Regeern insett worrn sünd, de doch egens gor nich harr regeern dörft? Un nu schüllt 89 Afordnete, de egens gor keen mehr sünd, en niet Wohlgesetz besluten? Mi dücht, Politologe Krause (gottloff keen Jurist) hett Recht: Kruse Gedankens waßt as willern Bananen in mienen Brägen. Ik weet, wat ik opstunns doon mutt, neemli dat Bundesverfatensgericht in Karlsruhe anropen un fellern, dat de Afordneten na dit Urdeel vun Sleswig Huusverbot in den Kieler Landdag kriegt. För Afordnete, de egens keen mehr sünd, will ik nich en Cent vun miene suerverdeenten Stüergroschens aftwiegen. Ok nich för Richters un Schoolmeisters un Polizisten un…

Mien Brägen fohrt Karussell, un allens vun wegen dit dösige Urdeel, dat ik nich verstah.