zur Navigation springen

Ostholsteiner Anzeiger

03. Dezember 2016 | 01:23 Uhr

Musik ist etwas Göttliches

vom
Aus der Redaktion des Ostholsteiner Anzeigers

Büst du all op de Lannesgornschau in Eutin west? Denn mol hin, is ja all Halftied! Un wo schöön is dat, all de Blomen to sehn – en Teken för Gott sien Leevde to uns Minschen. Wenn ik an de Blomen denk, denn wees ik: Gott denkt an uns Minschen un hett uns so veel Schönes geeven.

In de Geschicht vun den lütten Prinz fraagt he en Bloom: „Woans sünd denn de Minschen?“ Un de Bloom antert em: „De Minschen? Dat weet keeneen. De Wind weiht se weg. Se hebbt keene Wutteln. Dat is nich goot.“

Ja, dat is wohl wohr: Keen Bloom kann blöhen ahn de Wutteln. Un ok wi Minschen bruukt unse Wutteln, dormit wi en fasten Stand hebbt. De Wutteln holt uns fast in’t Leeven, se gifft uns allens, wat wi to’t Leeven bruukt. En Minsch ahn Wutteln ward hen- un her weiht, hett keen Menen un keen Richt, em fehlt de faste Stand un de Knööv, ok mol en Storm uttoholen.

In’n Sommer hebbt wi Tied, liek as de Bloomen, dat unse Wutteln wassen deit. Water un Sünnschien kümmt dorto, dat warme Wedder un Tied to’n Verholen. De Bloomen fraagt mi: Woans sünd diene Wutteln? Worüm hest du mannichmol so wenig Knööv un Moot, dien Menen to seggn? Or anner Minschen bitostahn un to hölpen? Un nich bangtoween, wenn dat mol düster warrd?

Woans sünd diene Wutteln? Dat hett Jesus ok de Minschen fraagt. Buust du op dien eegen Knööv, dien Geld, dien Verstand – or gifft dat dor noch wat anners, wat nich liek as Sand dörch de Fingers lopen deit? Jesus seggt dat ganz klor: Gott sien Leevde, dat is en faste Grund för uns un dat Leeven, dor köönt ok diene Wutteln wassen. Gott hett uns Minschen leev un gifft uns allens, wat wi bruukt – un noch veel mehr as dat.

Dorför sünd de Bloomen en Teken. Se doot nix dorför, dat se wassen un blöhen deit – un liekers sünd se so schöön un prächtig. Ik wünsch uns, dat in disse Sommertied unse Wutteln wassen un wi Minschen opblöhn deit – liek as en Sommerbloom.

Pastor Philipp Bonse, Eutin

zur Startseite

von
erstellt am 15.Jul.2016 | 11:09 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Themen zu diesem Artikel:

Kommentare

Leserkommentare anzeigen